Friday, April 27, 2007



آزاده دارائي زنگانلی





آزربايجان´ين اوره يي «زنگان»ا ايتحاف

آنا يوردو وطنيم زنگانيما قوربان اولوم
آنا يوردو وطنيم زنگانيما قوربان اولوم
شهريمين او ياراشيقلي آدينا قوربان اولوم
دولانيم دؤوره سينه، باغينا دروازه سينه
آغ چيچكلر آچيلاندا يازينا قوربان اولوم
او گؤزه ل منظره سي، بئهيشته بنزه ر هاواسي
او سرين درديمه درمان سويونا قوربان اولوم
يئل اسه نده اوجا بوي آغاجلارين اويناماغي
آغ بولودلاردان اوچان دورناسينا قوربان اولوم
گون چيخاندا او طراوتلي آغاجلار باشينا
گون آشاندان سورا گؤيچه ك آيينا قوربان اولوم

********

گؤره ن آللاه! وطنيمده كيم اؤلوب كيمسه قالوب
نوجاوانليق زامانين تاي توشونا قوربان اولوم
فيكري رٶوشن اولانا، شئعر-و ادب آنلييانا
بير به بير عئلم-و هونرپرورينه قوربان اولوم
بي ريا مؤمونونه، ساده موسلمانلارينا
اوره يي پاك اولانين ايخلاصينا قوربان اولوم
قوربت اورگه تدي منه هموطنين ارزيشيني
پيسينه، ياخچيسينا، هاميسينا قوربان اولوم
هر نه ايمانلي شرفلي موتعههيدلرينه
بير به بير تر تؤكه ن اينسانلارينا قوربان اولوم

*******

نئجه لذذتلي زامانلار، نه شيرين خاطيره لر
اؤلكه مين صولح-و صفا اييامينا قوربان اولوم
دانيشاندا او شيرين توركو گؤزه ل لهجه سينه
ائليمين سئويملي گؤيچه ك ديلينه قوربان اولوم
نه قده ر وصف ائيله سم زنگانيمي آز ديميشه م
او صفالي يارادان آللاهينا قوربان اولوم
فاصيله محو ائده بيلمه ز بو گؤزه ل مٶوهيبتي
جان كيميندير، من او جان پاره سينه قوربان اولوم
سن ده «آزاده» لال اول چون وطني ترك ائيله دين
سورادان داش آتيران توپوقينا، قوربان اولوم

آزاده دارايی زنگانلی (لس آنجلس-آمريكا)

تاپماجا

دئسه م بير تاپماجا راحت تاپارسان
اونون معناسينا حئيران قالارسان
نه ديلدير بو كي چوخ شيرين صدادير
اونا لهجه خطاب ائتمك خطادير
غني سطحينده فرهنگي قورولموش
اونون ديل قايداسي تكميل اولونموش
درين معنالي مينلرجه لوغت وار
هر ايسمه چوخ آچيق اوزلو صيفت وار
حوروفون، كلمه نين مئيداني چوخدور
چتين، بي قاعيده بير فئعلي يوخدور
ده ييل افعالي ناقيص داردا قالسين
كي تا فئعل-ي موعين فريادا چاتسين
زامان افعالينين چوخدور مسيري
باخارسان آيري ديلده يوخ نظيري
غريب ديلده اونو قانديرماق اولماز
بئله بير مطلبي آنديرماق اولماز
بو ديلده چوخلو شاعيرلر يارانميش
توكه نمه ز ماهنيلار ديلده قالانميش
بيليبسه ن، "آذري"دير، چوخ شيريندير
شيرينليكدن دييه رسه ن بال كيميندير
اينانميرسان، دانيش تا ايسته ديكجه
بو ديلدن دويماق اولماز سٶز دئديكجه
ديييبلر بير مثل فارسي شكردير
و آمما توركو`نو بيلمك هونردير

ائللر ديلي

آزربايجان يوردو


فخريله وطن توپراغينا جان ديييره م
آزربايجان يوردونا قوربان ديييره م

داغ داشلارينين رنگي بوتون مرجانا بنزه ر
قوشلار قاناتي سانكي حنابندانا بنزه ر
چايلاردا سولار دوپدورودور آينايا بنزه ر
داغدي دره دي چٶلدو، گولوستان ديييره م من
آزربايجان يوردونا قوربان ديييره م من

داغلاردا طبيعت ائله بيل خالچا سريبدير
چٶللرده ايپكدن هٶروله ن لاله اكيبدير
ائلده اوبادا سوتلو قويونلار بئجه ريبدير
يايلاغي سرين درديمه درمان ديييره م من
آزربايجان يوردونا قوربان ديييره م من

موسيقيسينين سازلاري تك ساز اولابيلمه ز
بير پارچا چيچكدير، يازي تك ياز اولا بيلمه ز
اول سورمه لي قيزلار گٶزو تك ناز اولابيلمه ز
ناز قيزلارينا سرو-ي خورامان ديييره م من
آزربايجان يوردونا قوربان ديييره م من

دوغموش آنالار اٶلكه ده مردانه اوغوللار
قودرتلي بيله ك، انلي كوره ك، قووه لي قوللار
ديللرده ديييلميش نبي تك بيرجه ناغيللار
اوغلانلارينا اوره كلي آسلان ديييره م من
آزربايجان يوردونا قوربان ديييره م من

Labels:


آردي-Ardı



مهسا مهدي زاده يوشانلويي



ائعتيراف

سونورام سنه، يوخ! سونورام سنسيزليييه
سانما يالواريرام سنه، من يالنيز آياقلارينا دوشمك ايسته ييره م
سانما يالواريرام سنه، يالنيز اللرينده اٶلمك ايسته ييره م
هئي سانما يالواريرام سنه، تكجه گٶزلرينه باخماق ايسته ييره م
اينانجين وارسا منه، اينان، يالوارميرام سنه، اٶزوم اٶز طالئعيمي ياخماق ايسته ييره م
ازلدن قارا گئييب گٶزلريم سئوگييه، ياسلي حياتيما قارا بير قييامت گٶزله ييره م
دوداقلاريمدا ماهنيلار سنه تاپينيب و كٶكسومده داغلار سنه سجده قيلير
هئي قارشيمدا دوران دلي اٶزله م! من سنله باش باشا چالماق ايسته ييره م
من دوشلريمده دوغولوب، گئرچكلرده بوغولان خاطيره لرين ان حزين سسييه م
من ياغمور گٶرمه يه ن كوچه لرده بولبوللر قفسييه م
من آناسيز قيزلارين "قيزيم لاي لاي" هوسييه م
اينانجين وارسا منه، آند ايچيره م، گٶزلريندن آخان داملالارين كئفليسييه م
سانما يالواريرام سنه، يالنيز سنه دٶنمك ايسته ييره م
سانما يالواريرام سنه، بير تك سنده اٶلمك ايسته ييره م
سانما يالواريرام سنه .....

Labels:


آردي-Ardı



نرگس اعظميان



داها باشقاسينا دايانامام
هر گون يئني بير باشقا
آمما اسكيليييني
او قده ر سئوديم كي يئنيلر،
قارشيسيندا اوچوروم تك اريرلر
.....

Labels:


آردي-Ardı



فاطمه مير حسن پور واحدي



منيم هاييمدان هايا گله ن كيمدير؟
بيري دئدي، بيري ائشيتدي
سوسوق قالديم
سسسيز ده اومود اولار مي؟
هاي هاي
منيم هاييمدان هايا گله ن كيمدير؟

ساچلاريمي قيسسالتديم
گٶزلريمين قاراسيني يودوم
بيرچه كلريمي آغارتديم
آمما سن؟
هاي سوسوق باخان!
هاييمدان هايا گله ن كيمدير؟ كيم؟

Labels:


آردي-Ardı



رباب سلطاني




اوخول ايكينجي صينيف اٶيره نجيسي (دانش آموز دوم دبيرستان)

آنا

لايلايلارين بولاغي
اولار آنا دوداغي
محببتين اوجاغي
اولار آنا قوجاغي

هر دردلرين داواسي
اولار آنا دوعاسي
بو دونيانين صفاسي
اولار آنا وفاسي

ائل

هر اينسانا شيريندير ديياري
ائلين اوجالماغييلا ووقاري
من ده سئويره م بو ائليمي چوخ
گٶز آچديم دونيايا بو ائلده
ديل آچديم اوول بو توركو ديلده
توركو دانيشيب سٶيله ميشه م من
توركو ديليني چوخ سئوميشه م من


Labels:


آردي-Ardı