سيما ديدار

سایین سیما دیدار (شاعیر-یازیچی و ژورنالیست) یاشماق ادبی- بدیعی (آذربایجان یئنی ادبیات درگیسی)نین سوروملو مودیری و گونئی آذربایجاندا یئنی ادبیاتین و ژورنالیزمین اؤنجوللریندن بیری کیمی ایللر بویو چالیشمیش و ایندی ایسه بؤیوک میللتیمیزه زیندان بورجونو اؤده مکده دیر...

بلکه ده بو بورج بوتون تورک اوغوللارینین اؤده یه جه یی گؤره ودیر. الیمیزدن نه گلیر کی؟ زیندان جانیوا یاراسین باجیم...
------------------------

سئوگیلیمه آذرین یئددی سی سئوگی گونوموزده سوندوغوم شعیر

ایلک باهارلاشمیشدی شهر سون باهار چاغیندا
سولموش یارپاقلار بئله یاشیللانماق ایستیردی
بیر سئوگی دوغولماقدایدی آخی
پارکین چیراقلارینین ایشیغیندا
سن له من
اوتورموش بیر نیمکت اوستونده
تانرینین نفسلرینین سسی گلیردی
ایکی داملا گؤز یاشیلا باشلادی
سونرا دا بیر گولومسمه
یئر ده باغیردی گؤی ده تانری دا
سنی سئویرم سسی گلدی بوتون دونیادان
سانکی یئنی دن دوغولدوق هر بیریمیز
باشدان باشلانماقدایدی دونیا
بیر سئوگی دوغولموشدو آخی
دونیادا بیزیم ایچین بیر اومود
سئوگیمیزه
تانری شاهیدلیک ائتدی
تاپیشیر منه دئدی
آما من
او قدر قیسقانیرام کی
سنی
تانریا بئله
تاپیشیرمادیم !

سيما ديدار
سه شنبه ۱۰ آذر ۱۳۸۸

----------------
من هله اؤلمه میشم...
سیما دیدار





منه نه اولموش

ثانیه- ثانیه قادینلاشیرام

زامان آیاقلاریمین آلتیندا یئنیلرک

دئیه سن اؤلمه میشم

اورگیم ترپه نیر هله

ثانیه لر ده دایانسا

من دایانمارام

اؤلدوره بیلمه دین منی

من هله وارام ...

محکوم

سنی سئومک اولارمی؟
سنین هوسینین محکمه سینده چکیلدی
معصومیتیم دار آغاجینا.
کلفچه لی اللریمله
سنینله دانس ائتمک اولارمی؟
سندن واز کئچمک ده اولماز!
منیم آنا یاسامدا
سنی سئومه مک
یاساقدیر !